Eisenhandel und Messererhandwerk der Stadt Steyr bis zum Ende des 17. Jahrhunderts

-102- Nr. 4: 1464 Sept 2, Kaiser Friedrich III. Bestätigt die Freiheiten der Messerer von Steyr und fügt weitere Bestimmungen, darunter die Erhöhung der Lehrzeit auf 5 Jahre hinzu. „Wir Fridreich von gots gnaden römischer kaiser zuallenntzeiten merer des reichs zu Hungern, Dalmatien, Croatien ec. Künig hertzog zu Österreich zu Steir zu Kernnden vnd zu / Krain, herr auf der Winndischenmarch vnd zu Portenaw, Graf zu Habspurg, zu Tyrol, zu Phiert vnd zu Kyburg, marggraf zu Burggau vnd Lanntgraue in Ellsas. Bekennen, daz für vns komen seinn vnser getrewn die messrer zu Steir / vnd baten vns diemütigclich, daz wir in ir brief gnad freihait ordnung vnd satzung, damit sy vnd dasselb ir hanstwerch von vns vnd vnsern voruordern fürsten von Österreich loblicher gedechtnus begnadt vnd gefreyt seinn als / herr vnd lanndsfürst geruchten ze confirmiern vnd zu bestetten. Wann wir aber allzeit begirlich genaigt seinn, aller vnser vndertan aufnemen nutz vnd eer ze meren vnd ze fürdern haben wir solh obbemelt der messrer zu Steir / fleissig bete angesehen vnd haben dadurch vnd von sundern gnaden vmb gemains nutz vnd aufnemens willen irs hanntwerchs in all obbemelt ir brief gnad freihait ordnung satzung damit sy vnd dasselbst ir hanntwerch von vns / vnd den obgemannten vnsern voruordern fürsten von Österreich begnadt vnd gefreit seinn vnd nemblich / daz sy vnsern vnd vnsers haws Österreich schilt New Österreich auf ire messer vnd klingen zu zaichen slahen vnd aller anndersn / gerechtikait mit hanndln vnd in annder weg haben prauchen vnd messen, sullen vnd mugen in massen vnd annder mitburger dasselbs zu Steir die von rechtens oder gewonheit wegen haben vnd prauchen als herr vnd lanndsfürst / geben confirmirt vnd bestet geben, confirmirn vnd bestetten, die auch wissenntlich in kraft des briefs, was wir zu recht daran bestettem, sullen oder mugen vnd mainen setzen vnd wellen daz dieselben ir brief vnd freihait in allen iren / punctn vnd artikeln daz inm begriffen genntzlich bei krefften beleiben vnd von nyemanden dawider getan noch gehanndelt werden sol. Wir haben in auch von newen dartzu vnd in sunderhait die hernach bestimbten gnad vnd frey / hait getan vnd gegeben, tun vnd geben in die auch wissentlichmit dem brief mit namen, daz ain yeder leer jünger der dasselb ir hanntwerch lernen wil von vier maistern irs hanmtwerchs fünf ganntze jar vmb dasselb hannt / werch zedienn(en) gedingt werden sol vnd wolen dartzue desselben ler junger frewnt in vnser frawn zech daselbs zu Steir in jarsfrist zweliff schilling phenning für in dahin ausrichten vnd geben. Es sol auch khain messrer noch gast / der ausserhalb vnser stat daselbs zu Steir purgkfrid gesessen in desselben irs hanntwerchs zech nicht ist noch mit vnsern burgern in vnser stadt daselbs zu Steir mitleidet khain messer offentlich noch haimblich verkauffen. / Welh aber solhs darüber treten, denselben mugen alsdann dieselben messrer wo sy die ankomen ire messer nemen vnd sullen vns die alsdann zu vnsern hannden antwürten vnd raichen so offt sich das begibt. Welh messrer / auch dasselbs zu Steir in irs hanntwerchs zech daselbs nicht geben oder tun, daz sy zetun oder zegeben schuldig vnd phlichtig seinn, die sullen von dem selben irem hanntwerch vnd den maistern desselben irs hanntwerchs vngefurdert sein / vnd beleiben. Doch so behalten wir vns vnd vnsern erben vor, die obbemelt ordnung vnd satzung zemern zemynnern vnd zeendern. Dauch gebieten wir den edlen vnsern lieben getrewn allem vnd yeglichen vnsern haubtleuten lannd / merschalhen, grauen, freinherrn, rittern vnd knechten, verwesern, burggrauen, phlegern burgermaisterm, richtern, reten, hannsgrauen, mauttern, zöllnern vnd allen anndern vnsern ambtleuten, vndertanen vnd getrewn vnd besunder vnsern getrewn lieben dem richter rat vnd vnsern burgern gemainclich daselbs zu Steir gegenwürtigen vnd kunftigen ernstlich vnd wellen, daz sy die obgenannten messrer zu Steyr vnd ir nachkomen bey den obbemel / ten vnsern gnaden freihaiten vnd diser vnser bestettung berüblich vnd volkomenlich beleiben lassen vnd sy dawider nicht dringen bekümern noch beswern noch des yemands anndern zetun gestatten in dhain weis. Doch ob wir / oder vnser erben die obbemelt satzung vnd ordnung meren, mynnern oder enndern wurden, als vorsteet vns vorbehalten. Das mainen wir ernstlich mit vrkund des briefs vnde vnser kaiserlichen maiestat anhanngunden insigl. Geben zu der Newnstat an suntag vor sand Peterstag ad vincula nach Cristi geburd im vierrzehenhundert vnd vierundsechtzigisten vnsers kaisertumbs im dreytzehenten vnseres reichs des römischen im fünfundtzwantzigisten / vnd des unngrischen im sechsten jare. Original Pergament mit anhängendem Siegel, Stadt Archiv Steyr Kasten XI/ Lade 28.